Nagpanawagan sang insigida nga bulig kag intervention sang gobyerno ang mga hog raisers sa banwa sang Leon, Iloilo bangud sa nagapadayon nga pagpanghangkat sa lokal nga industriya sang baboy.
Paagi sa petition letter nga ginpadala kay Iloilo Governor Arthur Defensor Jr. kag kay Second District Board Member Rolito Cajilig, nga amo ang chairperson sang Committee on Agriculture, ginpangabay sang mga hog raisers nga ipataas sa indi magnubo sa P180 kada kilo ang farm-gate price ukon presyo sang buhi nga baboy nga ginabaligya sang mga producer.
Ginpangabay man nila ang bulig sang gobyerno agud mapanubo ang presyo sang feeds, feed supplements, bulong kag iban pa nga kinahanglanon sa pagsagod sang baboy, lakip ang pag-usisa sang nagakaigo nga mga tikang agud makontrol ukon mabuhinan ang importasyon sang karne sang baboy kag buhi nga baboy nga mahimo makaapekto sa lokal nga mga producer.
Dugang pa diri, nagapanawagan man ang grupo nga palig-unon ang koneksyon sang mga lokal nga manugsagod sang baboy sa masaligan nga mga buyer, institutional market, meat processor, trader kag iban pa nga lehitimo nga merkado agud masiguro ang mas mahapos kag madali nga pagbaligya sang ila mga sagod nga baboy.
Sa interview naman sang Bombo Radyo kay Cajilig, iya ginpahayag nga ini nga apelar ukon petisyon ang nagduso sa iya nga magduso sang resolution nga nagapanawagan na sa national government particular sa Department of Agriculture (DA) nga mag-intervene sa hog industry bangud sa manubo nga farmgate prices apang nagapanglaak nga presyo sa local markets.
Ginpanawagan man sa DA nga magpatuman sang duha ka bulan nga temporary ban sa mga baboy halin sa iban nga probinsya nga magsulod sa Iloilo.
Nahibaluan nga suno sa mga hog raisers, daku ang epekto sa ila palangabuhian sang manubo nga presyo sang buhi nga baboy, samtang padayon man nga mataas ang presyo sang pagkaon sang baboy, mga supplement, bulong kag iban pa nga gasto sa produksyon.
Bangud sini, nagakabudlayan na sila nga mabawi ang ila kapital kag nagasto sa pagsagod sang baboy nga nagabutang sa peligro sang ila palangabuhian kag negosyo.
Ginpabutyag sang mga hog raisers nga daku ang mabulig sang mas barato nga mga kinahanglanon sa produksyon kag mas masaligan nga merkado agud mapadayon ang ila operasyon, malikawan ang dugang nga pagkapierde, kag maprotektahan ang palangabuhian sang mga pamilya nga nagasalig sa baboy bilang palangabuhian.#
