Ginpanawagan sang Philippine Air Force (PAF) sa mga kwalipikado nga mga Ilonggo nga magpreparar na sa pagproseso para sa mga requirements agud nga mangin kabahin sang ila pwersa.
Suno sa mga katapo sang Tactical Operations Group VI nga sanday 2nd Lt. Verna Mae Baito, Director for Admin and Personnel, kag Technical Sergeant Jennifer Talamor, Assistant Non-Commissioned Officer-In-Charge for Administration and Personnel, buksan na sa Nobyembre 20-23 ang pagbaton sang online application para sa PAF Officer Candidate Course.
Ang mga kwalipikasyon amo ang masunod:
* Babaye ukon lalaki kag natural born ukon naturalized Filipino citizen
* Baccalaureate degree holder
* Indi magnubo sa 20-anyos ang edad, apang indi man magsobra sa 27-anyos sa petsa sang appointment
* May good moral character kag wala sang ano man nga derogatory records
* Single kag wala nakaagi-kasal
* Wala sang bata kag wala sang legal obligation nga suportahan ang bata ukon kabataan
* Nakapasar sa physical/medical examination kag mahatagan sang Physical Profile 1 sang PAF Medical Board
* May kataason nga indi magnubo sa 5 ft para sa babaye kag lalaki
Gin-athag sang PAF nga kun may mas manubo diri nga height, kinahanglan nga maka-secure sang certification halin sa National Commission on Indigenous Peoples (NCIP).
Lakip sa mga benepisyo nga iga-enjoy sang mga kabahin sang PAF amo ang insurance kag health care benefits, ang competitive pay kag allowances, may gross pay nga masobra sa P53,000, kag may oportunidad nga mangin piloto.
Ginpahanumdom man sang PAF ang mga ginadumilian nga tattoo kag tuhog ukon piercing, kag ang pagpasigurado nga physically kag mentally fit ang mga applicant.
Sa tattoo, kinahanglan nga mapanas ini paagi sa licensed medical practitioner kag kinahanglan nga may ipresentar nga medical certificate ukon pamatuod nga nagpaidalom ang applicant sa removal procedure.
Sa piercing naman, gina-abisuhan man ang applicants nga ipatahi ukon ipaidalom sa surgical closure ang tuhog kag kinahanglan man nga ipresentar ang medical certificate antes mabaton ang application.
Natalana pa nga i-anunsyo sang PAF ang petsa sang pasinawan.
Ginapanugyan man ang interesado nga mag-apply sa pagbisita sa website sang Philippine Air Force sa https://www.paf.mil.ph ukon sa official Facebook page sang Tactical Operations Group VI.#
