Ginduso ni Senate Deputy Majority Leader JV Ejercito ang Anti-Online Hate and Harassment Bill ukon kilala man nga Emman Atienza Bill.
Sandig sa press release sang Senate of the Philippines nga nakabalhag sa official website sang upper chamber, tuyo sang hagna nga ma-address ang nagadamo nga kaso sang cyberbullying, fake news, kag online defamation diri sa Pilipinas.
Ginbasehan sang senador ang kaso ni Emman, anak sang TV presenter nga si Kuya Kim Atienza, nga nabiktima man sang online hate.
“While social media serves as a platform to advocate for truth, it has also given room for ruining reputations, spreading fake news, rumors, false accusations, and violence. In reality, there are no delete or edit buttons for the ones we have hurt,” suno sa senador.
Tuyo sini nga maprotektahan ang mga indibidwal sa online harassment kag mapabaskog pa ang implementasyon sang mga layi agud nga malikawan ang cyberbullying and online hate. Ang ginatumod sini nga mga layi amo ang Cybercrime Prevention Act kag ang Anti-Bullying Act.
“And as Emman used to always say, to promote ‘a little kindness,’” pahayag pa sang senador sa iya ginduso nga hagna.
Sa sini nga hagna, ginaduso ang silot para sa mga akto kaangay sang cyberlibel, online hate speech, kag harassment.
Magabaton naman ang mga biktima sang psychosocial support kag counselling paagi sa Victim Support and Protection Program. Ang tanan nga gasto sa sini nga mga serbisyo ang pagasukton halin sa perpetrators.
Ini nga perpetrators ang mangatubang naman sang multa nga halin sa P50,000 tubtub sa P200,000 kag pagkapreso kun mapamatud-an nga guilty. Kun mga menor de edad naman ang involved, may patigayunon nga counseling kag pagpasangkad sang edukasyon agud nga matapna ang negatibo nga pamatasan.
“We hope Emman’s passing will not be in vain as we push for the immediate passage of this measure. We need to bring back kindness online, where people pause and think before they post. We must prevent another tragedy where our fellowmen, especially the youth, are pushed to the breaking point by the vitriol of online hate,” suno pa kay Ejercito.
Sang nagligad nga Oktubre sang gin-anunsyo sang pamilya Atienza ang kamatayon sang 19-anyos nga si Emman nga isa man ka mental health advocate.
Ginpresentar naman sa mag-asawa nga Kim kag Felicia ang kopya sang bill kadungan sang haya ni Emman. Nahibaluan nga sa Kamara, may yara man sang counterpart measure nga gin-file si Negros Occidental 3rd District Rep. Albee Benitez.#
