ILOILO CITY – Daku ang impluwensya sang isa ka fiesta queen sa mga tawo sa iya nga palibot.
Ini ang luyag ipakigbahin ni Aimee Christie Ong, Jaro Fiesta Queen 2000, subong nga nagahilapit na ang fiesta ni Nuestra Señora de la Candelaria ukon Our Lady of Candles, ang patron saint sang Western Visayas.
Sa interview sang Bombo Radyo Iloilo kay Ong, iya ginpahayag nga antes siya ginkoronahan bilang reyna sang nasambit nga distrito, ginhuna-huna man niya nga daw artista ang pamatyagan sang persona nga mabutang sa tarpaulin sa Jaro Plaza.
“Sabi ko that time, ‘ganda no, parang artista’,” pahayag ni Ong. Sang amo nga tion, 17 anyos siya kag second year na sa kolehiyo sa Manila. “I was shy before pero it was a good experience.”
Suno kay Ong, nareyalisar niya ang mas importante nga butang sang tion nga siya na ang isa sa nabutang sa maragtas sang fiesta sang Jaro. Ini amo ang pagtuo sa Diyos kag debosyon kay Nuestra Señora de la Candelaria.
“Noong naging fiesta queen ako, I saw the devotion of people from Jaro and all the Ilonggos kay Nuestra Señora de la Candelaria. Siguro it was one way na naging fiesta queen ako to devote myself more sa aton nga Candelaria,” pahayag ni Ong.
Si Ong ang ginkoronahan nanday anay Presidente Gloria Macapagal Arroyo kag Ilonggo Senator Franklin Drilon.
Subong, may yara na siya sang tatlo ka anak kag nagatinir sa distrito sang Molo.
“Nag-trip down memory lane ako. Nakita ko ang gowns. Ang tanan. It was really a good experience. It is really a good opportunity to be a role model and ma-address ang imo nga balatyagon kag kun ano ang gusto mo matabo kag ano imo goals. You will be able to impart that sa imo fellow Ilonggos.”
