Isa si AAMBIS-OWA Party-list Representative Atty. Lex Colada sa mga nag-endorso sang ikatatlo ngann impeachment complaint batok kay Vice President Sara Duterte sa House of Representatives Secretary General.
Si Colada ang bana ni Guimbal, Iloilo Mayor Jennifer Garin-Colada.
Kaupod ni Colada nga nag-endorso amo si Camarines Sur 3rd District Representative Gabriel Bordado Jr.
Sa subong, nagapangatubang naman si Duterte sang ikatatlo nga impeachment complaint sa House of Representatives.
May 12 ka mga complainants sa nasambit nga impeachment complaint sa diin ginalakipan ini sang mga abogado, pari, non-government organization (NGO) workers halin sa Mindanao kag sa iban pa nga bahin sang pungsod.
Ang ginrason sang mga ini sa pag-file sang impeachment complaint batok kay Duterte amo ang graft and corruption kag betrayal of public trust.
Lakip sa mga grupo nga nakakuha sang atensyon nga nag-file sang impeachment complaint amo ang National Union of Peoples’ Lawyer (NUPL-Mindanao).
Ang reklamo ang naangot sa gihapon sa ginapahayag maanomaliya nga paggamit ni Duterte sang confidential funds sang Office of the Vice President (OVP) kag Department of Education (DepEd).
Nagpasalig naman ang mga complainants kag endorsers nga magpagwa sang dugang nga mga pahayag sa tion nga matapos na ang filing procedures.
Nahibaluan nga antes ang bag-o nga impeachment complaint, may yara na sang duha ka pending nga reklamo nga gin-file sa House of Representatives.
Lakip sa mga nag-file sang duha ka nauna nga impeachment complaints amo ang civil society kag militant organizations.
