Indi lang si Vice President Sara Duterte ang nagbisita sa balay ni former Vice President Leni Robredo sa Naga City, Camarines Sur kundi mangin sanday Interior Secretary Benhur Abalos kag Sen. Ramon Revilla Jr.
Pareho kay Sara, sanday Abalos kag Revilla ang nagkadto man para sa selebrasyon sang Feast of Our Lady of Peñafrancia.
Si Revilla ang kumpirmado na nga magapadalagan liwat bilang senador sa 2025 midterm elections, samtang matunog man nga ginabati-bati nga magasulod naman sa pulitika si Abalos.
Pahayag sang interior secretary, nagkadto siya sa Naga City para sa festival bangud deboto ang iya pamilya sang Our Lady of Peñafrancia, kag sang amo nga tion, napinsaran sini nga mayo man nga mag-courtesy call siya kay Robredo.
Nag-post naman sang pictures si Revilla kag nagsiling nga suod gid nga abyan sang ila pamilya si anay Sec. Jesse Robredo nga amo ang nagtaliwan nga bana ni Leni.
Sunod man nga gin-athag sang former vice president nga sa kada Peñafrancia, welcome gid ang tanan sa ila balay sa Naga City halin sang una bisan ano pa man ang duag sa politika.
“During Peñafrancia, we do not look at political colors. There’s no party affiliation, everything here is politically neutral. Everyone who comes for the Lady is welcome here,” pahayag ni Robredo. “Since my husband became mayor in 1988, everyone who visits Naga for the Lady is very much welcome.”
Sang Byernes, matandaan nga sa isa ka makakilibot nga development, si Sara mismo ang una nga nagkadto sa balay ni Robredo kag nagtinir sang isa ka oras. Nagdepensa ang Office of the Vice President nga indi desperada si Sara, samtang ginklaro naman ni Leni nga personal kag indi political ang iya gin-istoryahan.
