ILOILO CITY – Mas madamo ang Enhanced Community Quarantine violators sa tion sang aga kun ipanggid sa gab-i.
Ini matapos nga kapin sa 100 ang nadakpan nga wala nagasunod sa physical distancing kag indi pagsuksok sang facemask sa pampubliko nga lugar sa syudad sang Iloilo.
Sa interview sang Bombo Radyo kay Punong Barangay John Eric David, Presidente sang Association of Barangay Captains sa City Proper, iya ginpahayag nga apisar sang sulit-sulit nga panugyan, madamo sa gihapon ang wala nagasunod.
Suno kay David, ang pagpabilin sa sulod sang balay tubtub nga matapos ang Enhanced Community Quarantine ang daku na nga bulig agud nga indi maglapta ang virus.
Ginpahayag ni David nga dapat isa lang sa tagsa ka pamilya ang magguwa sa balay sa tion nga magpamalaklon ukon may yara sang importante nga transaksyon.
Nagahingyo naman si Police Major Francisco Paguia Jr., hepe sang Police Station 1, sa tanan nga likawan ang pagguwa sa balay agud nga malimitahan ang exposure sa virus.
Suno kay Paguia, ang kada isa ang may yara sang katungdanan nga mabuligan ang medical frontliners paagi sa pagsunod sang panugyan sang Department of Health.
Ginpahayag ni Paguia nga madali nga maglaton ang virus kun may yara sang physical contact sa infected nga tawo.
