Ginaplano nga ihaya sa Iloilo City National High School ang abo ang sang mag-asawa nga manunudlo nga napatay sa sunog sa Brgy. Infante, Molo, Iloilo City.
Ang mga biktima amo ang mag-asawa nga sanday Julius Reyes kag Louelyn Reyes nga pareho nga manunudlo sa Iloilo City, kag ang ila anak nga si Amber Marie, pito ka tuig.
Sa interview sang Bombo Radyo kay Alpha Java, Principal sa Iloilo City National High School, iya ginpahayag nga samtang yara ang abo sang mag-asawa sa buluthuan, magapatigayon sila sang vigil kag tribute.
Suno kay Java, ini agud nga tanan nga mga manunudlo ang makadu-aw lang man sa mag-asawa bisan sa ulihi nga tinion.
Nagpalab-ot man sang pinansyal nga bulig ang faculty sang Iloilo City National High School sa pamilya sang mga manunudlo.
Una na nga nagpabutyag ang eskwelahan nga dako nga kadulaan sa ila buluthuan ang pagtaliwan sang mag-asawa nga manunudlo.
Nahibaluan nga may patigayunon pa kontani nga ‘Pinta Tawo’ ang mag-asawa nga manunudlo, ini ang bag-o nga aktibidad sa Special Program in the Arts (SPA) sa amo man nga buluthuan.
Ang mga manunudlo ang naka-focus sa pagtudlo sa Program in the Arts Major in Visual Arts.
