Indi kumporme ang isa ka constitutional law expert sa pahayag ni Senate Presidente Francis “Chiz” Escudero nga indi sila makapatigayon sang impeachment trial VP sa Senado kontra kay Vice President Sara Duterte samtang on-break ang Kongreso.
Sa interview sang Bombo Radyo kay Atty. Michael Henry Yusingco, Senior Research Fellow sang Ateneo Policy Center sang Ateneo School of Government, iya ginpahayag nga apisar nga rasonable gid man nga indi gilayon makapatigayon sang trial ang Senado, wala dapat naghatag sang konklusyon si Escudero nga imposible nga matigayon ini subong.
Suno kay Atty. Yusingco, sa pagkamatuod, nagakinahanglan gid man sang bastante nga preparasyon ang Senado agud mangin impeachment court apang kun masarangan man lang nila nga handaan ini, indi na dapat maghulat ang Senado nga mag-resume ang ila session sa Hunyo 2 antes pa sila maka-proceed sa impeachment trial.
Pahayag pa niya, may sinumpaan sa konstitusyon ang mga senador kag kabahin ini sang ila responsibilidad.
Dugang niya, ang pahayag ni Escudero ang posible nga repleksyon sang ila prayoridad bilang mga opisyal sang gobyerno kun ila pabuyan-buyanan ini kag pasulabihon ang nagahilapit nga eleksyon.
