Nag-file sang petisyon ang isa ka abogado agud nga mahingyo sa Korte Suprema nga suguon ang Senado nga mag-convene na bilang impeachment court kag umpisahan ang trial batok kay Vice President Sara Duterte.
Ang nagpasaka ang 22-page petition for mandamus amo si Atty. Catalino Generillo Jr. nga nakapungko anay bilang Presidential Commission on Good Government special government counsel.
Sa iya petisyon, ginsiling sini nga ang Konstitusyon wala nagatugot sa Senado nga mag-atrasar sang ila ulubrahon kun recess ukon session break.
Pahayag sini, may constitutional duty ang Senado nga indi sini mapalagyuhan kag ini amo ang pag-tingob na sa labing-madali nga tion bilang isa ka impeachment court kun mabaton na ang Articles of Impeachment halin sa Kamara.
May ginpadala man nga kopya kay Senate President Francis “Chiz” Escudero kag sa Office of the Solicitor General.
Pebrero 5 sang gin-impeach sang Kamara si Sara matapos nagpabor ang 215 ka mga mamalidha. Pagkasunod nga inadlaw, ginkumpirma nga may 25 ka dugang nga mga kongresista nga nagpirma man sa complaint, buot silingon, 240 na ang pabor sa impeachment.
Sang Pebrero 5 man sang nag-adjourn ang session sa Kongreso bangud sa eleksyon, kag natalana nga mag-resume sa Hunyo 2.
Una na nga ginpahayag ni Escudero nga wala ini sang plano nga magpatawag sang special session agud nga mapatigayon ang trial kay Sara bisan naka-election break ang Kamara kag Senado.
