Mahimo pasakaan sang kaso administratibo ang isa ka abogado nga magpalapta sang impormasyon may kaangtanan sa isa ka tawo nga positibo ukon infected sa human immunodeficiency virus (HIV).
Sa interview sang Bombo Radyo kay Atty. Charl Stuyver Moleño, iya ginpahayag nga sa idalom sang Republic Act No. 11166, ukon “Philippine HIV and AIDS Policy Act” ginaproteheran ang tanan nga impormasyon sang mga pasyente nga may HIV kag gina-address ang mga isyu may kaangtanan sa amo nga balatian.
Matandaan nga sang damlag lang, ginpahayag ni Atty. Larry Gadon nga napatay si the late President Benigno Aquino III bangud sa HIV.
Apang suno sa utod ni PNoy nga si Pinky Aquino-Abellada, napatay ang iya nga utod bangud sa renal disease secondary to diabetes kag indi sa HIV.
Suno kay Moleño, sa idalom sang AIDS Policy Act, nasaad nga ginadumilian nga magdisclose sang pangalan, picture ukon bisan ano nga impormasyon kun wala pahanugot sang isa ka tawo nga may HIV ang isa ka editor, publisher, reporter ukon columnist lakip na ang sa printed materials, announcer ukon producer sa television kag radio broadcasting, ukon producer kag director sang pelikula sa isa movie industry, ukon bisan sin-o nga indibidwal kag kabahin sang organisasyon sa social media.
Ang mga magalapas sa nasambit nga layi ang magapangatubang sa mga masunod nga penalidad:
- Anom ka bulan tubtob duha ka-tuig nga pagkapreso kag multa nga indi magnubo sa P50,000 kag indi magsobra sa P150,000 para sa mga naglapas sa confidentiality sang isa ka HIV patient;
- Duha ka-tuig tubtob lima ka-tuig nga pagkapreso kag multa nga indi magnubo sa P150,000 kag indi magsobra sa P350,000 para sa mga nagpalapta sang impormasyon may kaangtanan sa HIV status sang isa ka pasyente sa madamo nga tawo, sa online, kag sa media; kag
- Lima ka-tuig kag isa ka-adlaw tubtob pito ka-tuig nga pagkapreso kag multa nga indi magnubo sa P350,000 kag indi magsobra sa P500,000 para sa health professional, medical instructor, worker, employer, recruitment agency, insurance company, data encoder, kag iban pa nga custodian sang medical record, file, data, ukon test result nga naglapas man sa confidentiality sang isa ka pasyente sang HIV
Pahayag ni Moleño, magluwas diri, mahimo man pasakaan sang Civil case ang mga magalapas sa AIDS Policy Act.
Dugang pa niya, may kaangtanan kay Atty. Gadon nga nagbuya sang alegasyon batok kay Aquino, santo sa Model Code of Judicial Conduct: Canon 1, ginamanduan ang mga abogado nga maghalong sa ila hulag, sa ila gina hambal, ilabi na kun maka-apekto ini sa legal profession in general.
Ginamanduan man ang mga abogado nga sundon kag respetohon ang tanan nga layi santo sa Canon 1 sang Code of Professional Responsibility.
Gin-athag man ni Moleño nga ang isa ka abogado nga may iban pa nga trabaho kaangay ni Atty. Gadon, ang ginamanduan sa gihapon nga sundon ang pagsulundan nga required ukon kinahanglanon para sa mga abogado.
Kun magalapas ang isa ka abogado sa amo nga layi, mahimo ini pasakaan sang kaso administratibo.
Nagapati man si Moleño nga bisan ano pa ang disposisyon ukon trabaho sang isa ka tawo, importante kag nagakadapat ang paghatag sang nagakaigo nga respeto sa iban nga tawo apisar ano man ang posisyon sini sa kabuhi.
Suno sa iya, nagapati man siya nga wala sang lugar sa legal profession si Atty. Gadon bangud wala sini ginhatagan sang respeto ang pagkamatay sang anay presidente sa diin ang death ukon ang kamatayon ang ginakabig nga sagrado sang kadam-an nga Filipinos.
Nahibaluan nga sa subong, ginsuspende na sa pagka-abogado si Atty. Gadon matapos sini ginpalapta sa social media nga nag-angkon sang HIV ang anay lider sang pungsod kag ang nasambit nga balatian ang gintunaan sang pagkamatay sini.
