ILOILO CITY- Nagakadapat nga tahuron sang MORE Electic and Power Corporation (MORE Power) ang desisyon sang Mandaluyong RTC branch 209 sa petition for declaratory relief nga ginpasaka sang Panay Electric Company (PECO).
Santo sa nangin desisyon sang Korte, indi na dapat nga padayunon pa sang MORE Power ang expropriation proceedings sa assets sang PECO.
Sa interview sang Bombo Radyo kay Atty. Estrella Elamparo, abugado sang PECO, iya ginpahayag nga santo sa nangin desisyon sang Mandaluyong RTC, ginapunggan na ang MORE Power nga padayunon pa ang expropriation proceedings.
Gin-athag man ni Elamparo nga ang ginapunggan lang sang desisyon sang Mandaluyong RTC amo ang MORE Power sa ila expropriation proceedings kag indi ang Iloilo RTC.
Nagakadapat man suno kay Elamparo nga tahuron man sang Iloilo RTC ang desisyon bangud nga una na nga nagpasaka sang kaso ang PECO sa Mandaluyong RTC nga amo ang may jurisdiction sa isyu sang constitutionality sang expropriation provision sang Republic Act 11212.
Ginahulat na lang nila sa subong suno kay Elamparo kun bala may masunod pa nga hearing sa Iloilo RTC matapos wala nadayun ang hearing nga una na nga gintalana sa subong nga adlaw.
Ginpahayag man sang natungdan nga wala nila ginakuhaan sang kinamatarung ang MORE Power nga mag-angkon sang legal remedies santo sa Rules of Court kag mahimo man ang MORE Power nga makakuha sang prangkisa apang sa subong, ang PECO lang ang may yara sang Certificate of Public Convinience and Necessity (CPCN).
Wala naman ginhatagan sang CPCN sang Energy Regulatory Commission (ERC) ang MORE Power bangud indi pa handa ang kompaniya nga mangin electric power provider sa syudad sang Iloilo.
