ILOILO CITY – Indi na makwestyon sang Korte Suprema ang absolute pardon nga ginhatag ni Presidente Rodrigo Duterte kay US Marine Lance Corporal Joseph Scott Pemberton.
Sa pagpaathag sang Law expert nga si Atty. Joenar Pueblo, ang absolute pardon nga ginhatag ni Presidente Duterte amo ang pagpatawad sa sala nga nabuhat nga nagaresulta sa full restoration sang civil rights ni Pemberton nga wala sang bisan ano nga kondisyon.
Suno kay Atty. Pueblo, makabig nga isa ka maayo nga political capital sa international level ang ginhimo sang Presidente apang kun lantawon ang legal nga basehan, naserbehan naman ni Pemberton ang iya sintensya kag nahatagan sang Good Conduct Time Allowance paagi sa Visiting Forces Agreement sa tunga sang Pilipinas kag Estados Unidos.
Ginpahayag ni Atty. Pueblo nga kasubong nga case-closed na bangud nga Executive Power ang gingamit sa pagpatawad sa sala nga nabuhat sang akusado nga US Marine kag mahimo lamang ini nga makwestyon kun Conditional Pardon lamang ang ginhatag sang Presidente.
Magluwas diri, irrevocable man ang ginhatag nga Good Conduct Time Allowance kay Pemberton bangud nga indi ini matigayon kun wala sang certification gikan sa Bureau of Corrections.
Nahibalu-an nga si Pemberton ang ginpamatbatan sang 6 tubtub 10 ka tuig nga pagkapreso sa kaso nga Homicide sang 2015 bangud sa pagpatay sa Filipina transgender nga si Jennifer Laude sang 2014 apang kun sundon ang GCTA computation, naglab-ot na sa 10 ka tuig, isa ka bulan kag 10 ka adlaw ang pagserbisyo sang US Marine.
