JOLO, SULU – Ginatudlo sang Philippine Army ang Abu Sayyaf Group nga amo ang mastermind sa twin bombing sa Jolo, Sulu kun sa diin 13 ang kumpirmado nga patay samtang masobra naman sa 70 ang pilason.
Suno kay Lt. Col. Ronald Mateo, Civil Military Relations Officer sang Philippine Army 11th Infantry Division, wala pa sang kumpirmasyon gikan sa Abu Sayyaf Group nga sila ang may kahimu-an sang twin bombing apang sila lang ang active terrorist group sa Sulu.
Maathag suno kay Mateo nga ang target sang pagpamomba amo ang security forces sa lugar kun sa diin ang bomba ang ginbilin sa isa ka motorsiklo nga naka-parking.
Sa 13 ka patay, pito ang suldado kag anum ang sibilyan samtang sa 76 ka pilason, 48 ang sibilyan, 9 ang pulis kag 19 ang suldado.
Sa ika-duha nga pagsigabong, babayi ang ginatudlo nga suicide bomber apang indi pa matumod kun ano ang nationality.
Bangud sini, gin-lockdown ang banwa sang Jolo samtang nagapadayon ang imbestigasyon.
Ang una nga pagpamomba ang natabo sa atubang sang isa ka food shop sa Serantes Street, Barangay Walled City sa Plaza Rizal samtang ang ika-duha nga pagsigabong ang natabo, 100 meters ang distansya gikan sa nasambit nga lugar.
Natabo ang bombing 11:55 sang aga kag 1:00 sang hapon, Agosto 24.
