Nagdangop sa Bombo Radyo Iloilo ang pila sa mga residente sang Barangay Getulio, Buenavista, Guimaras bangud wala pa sila makabaton sang ayuda gikan sa AC Energy matapos maapektuhan sang oil spill gikan sa naglupok nga power barge sa Bo. Obrero, Lapuz, Iloilo City sang Hulyo 3 , 2020.
Sa interview sang Bombo Radyo kay Anabelle Jacuba, residente sang Barangay Getulio kag head sang Barangay Fisheries and Aquatic Resources Management Council (BFARMC), iya ginpahayag nga malapit isa na ka tuig kag wala sila sa gihapon mahatagan sang ayuda nga nalakip man ang ila palangabuhian nga naapektuhan.
Suno kay Jacuba, madamo sang ginapangayo ang AC Energy nga mga requirements sa ila.
Dugang pa niya, nagpahayag ang AC Energy nga kinahanglan rehistrado nga fisherfolks ang makabaton sang ayuda apang sang ila ginpamangkot ang Department of Agriculture, nagpahayag ang ahensya suno sa iya nga rehistrado man ukon indi, kinahanglan sa gihapon nga makabaton sang ayuda ang mga ini bangud apektado man sila sang oil spill.
Satang gin-athag naman ni Gabino Ramon Mejia, Executive Director kag Head-Plant Operations sang AC Energy, nga duha ka mga butang ang ginakonsidera agud nga irekomenda ang payout ukon ang paghatag sang ayuda.
Suno kay Mejia, ang insurer amo ang nagabayad sa mga naapektuhan nga mga residente kag may yara diri sang mga nagakaigo nga pagsulundan.
Una, kinahanglan nga lehitimo nga fisherfolk ang magabaton sang ayuda. Buot silingon , nagakadapat nga rehistrado ini sa Fish Registry nga santu sa resolution sang Guimaras Provincial Government.
Kag ang ika-duha, nagakadapat nga validated ang dokumento sang fisherfolk base sa ginapangayo sang insurer.
