ILOILO CITY – Magapangulintas sang criminal, civil kag administrative cases ang AC Energy bangud sa oil spill kasunod sang paglupok sang power barge sa Bo. Obrero, Lapuz, Iloilo City.
Sa pagpaathag sang Legal expert nga si Atty. Joenar Pueblo, tuman na ka lapad ang oil spill kun sa diin apektado na ang pila ka coastal town sa probinsya sang Iloilo lakip na sa probinsya sang Guimaras.
Suno kay Atty. Pueblo, apektado ang palangabuhi-an sang fiherfolks lakip na ang turismo kag bangud sini, lauman ang negatibo nga epekto sa ekonomiya.
Ginpahayag ni Atty. Peublo nga indi lamang ang Philippine Coast Guard ang mahimo nga makapasaka sang kaso kundi lakip na ang private individual kag Local Government Unit nga apektado sang oil spill kag ang ahensya sang gobyerno nga may katungdanan sa pagtipig sa dunang manggad kasubong sang Department of Environment and Natural Resources.
Indi lamang ang mga empleyado nga on-duty ang may salabton kundi lakip na ang mga opisyal kag tag-iya sang kompaniya bangud sa command responsibility.
Magluwas sa pagkapreso sang 6-12 ka tuig, bayaran man sang AC Energy ang tanan nga danyos kag multa sa halit nga gintuga kag mahimo man nga bawi-an sang business permit kag lisensya ang kompaniya.
Magluwas sa paglapas sa Section 107 sang Fisheries Code, mahimo man nga basehan sa pagpasaka sang nagakaigo nga kaso ang Clean Water Act.
Sa pagdesisyon, may duha ka option ang Korte kag ini amo ang Writ of Kalikasan kag ang Writ of Continuing Mandamus.
