ILOILO – Nakapasa na ang AC Energy sang environmental management plan sa Department of Environment and Natural Resources Environmental Management Bureau.
Sa interview sang Bombo Radyo kay Gabino Ramon Mejia, pinuno sang Plant Operations sang AC Energy, iya ginpahayag nga lakip sa amo nga detayaldo nga plano amo ang masunod:
(1) pagtapos sang oil spill cleanup kag pagsigurado nga yara na sa safe level ang water quality sa baybayon nga apektado sang oil spill;
(2) nagapadayon nga monitoring sang air quality kag pagsigurado nga yara man sa safe level ang hangin antes pabalikon sa ila tagsa ka panimalay ang mga residente;
(3) pagtipon sang mga materyal kag basura nga kontaminado sang langis; kag
(4) rehabilitation plan para sa mga mangrove areas kag lugar-pangisdaan nga apektado sang oil spill.
Apisar nga napasa na ang environment plan, nagpasalig si Mejia nga magapadayon ang AC Energy sa pagpakig-angot sa Iloilo City Government, iban pa nga Local Government Units kag ahensya sang gobyerno para sa nagakaigo nga lihok.
“MAGASUNOD SA LAYI”
Sa bahin naman sang kaso-kriminal nga ginpasaka sang Philippine Coast Guard sa AC Energy may kaangtanan sa aquatic pollution nga natuga sang paglupok sang power barge sang kompaniya, hugot ang panindugan ni Mejia nga magakooperar sila sa imbestigasyon.
Suno kay Mejia, wala sang may luyag nga matabo ang insidente apang indi nila pagpalagyuhan kun ano man ang nakasaad sa layi.
“EVACUATION”
Sa bahin naman sang paghatag sang ayuda sa apektado nga mga residente, ginpahayag ni Mejia nga sundon nila ang tanan nga parameter sang Iloilo City Government.
Suno kay Mejia, lakip sa mga lihok nga napatigayon na amo ang pag-evacuate sang mga apektado nga residente sa mga hotel sa syudad sang Iloilo para sa mas komportable nga pagginawi.
Magluwas diri, luyag man siguraduhon sang AC Energy nga indi ma-infect sang Coronavirus Disease 2019 (COVID-19) ang mga residente kun magginutok sila sa evacuation centers.
