Nagsabat ang AC Energy sa reklamo sang pila ka residente sang Barangay San Miguel, Buenavista, Guimaras matapos ginapahayag wala pa nabaton ang cash assistance nga ginpasalig sang kompaniya matapos ang natabo nga oil spill sang Hulyo 3.
Sa interview sang Bombo Radyo kay Gabino Ramon Mejia, pinuno sang plant operations sang AC Energy Philippines, iya ginpahayag nga may yara sang proseso nga ginsunod kun sa diin ang claimants ang responsable sa pagkompleto sang mga dokumento kag ini ang ginsumite sa local government unit.
Kasunod sini, ini ang ginpasa sa law firm sa syudad sang Iloilo nga amo ang nagvalidate kun kompleto ang mga dokumento.Sa amo nga proseso suno kay Mejia, kun indi kompleto ang dokumento, igabalik ini sa claimants, samtang kun kompleto na ang dokumento, ipasa ini sa insurer.
Santo sa data sang nagligad nga semana, ‘less than 10 million’ na ang nabaton sang insurer suno kay Mejia.
Nagpasalig naman ang natungdan nga gina-follow up sang AC Energy ini nga mga reklamo kag ila pa iga-check sa law firm kun ano ang problema.
Nahibaluan nga santo sa reklamo sang mga taga-San Miguel, nagpositibo sa COVID-19 kag ginquarantine ang tiglawas sang AC Energy nga nakadesignar sa ila nga lugar, gani nga wala na ini nakabalik pa sa ila.
SUNO SA LGU
Samtang, nagdepensa naman ang local government unit sang Buenavista nga nahimo nila ang koordinasyon sa mga opisyal sang coastal barangays sa banwa.
Sa interview sang Bombo Radyo kay Buenavista Mayor Eugene Reyes, iya ginpahayag nga napasa sang local government unit ang tanan nga dokumento sang mga apektado nga mga residente kag natugyan na ini sa mga law firm nga gindesignar sang AC Energy.
Suno kay Reyes, una nga semana sang Setyembre sang ginpasa ini nga mga pormas kag wala na sang nabalik sa ila.
May mga residente naman suno sa alkalde nga nakabaton na sang ayuda. Naghingyo ang alkalde sa law firm nga ipahibalo man sa mga residente kun kulang ang ila nga dokumento agud masapar nila ini kag makabaton man sang ayuda.
