ILOILO CITY – Wala pa nakabaton sang report si Punong Barangay Roberto Niño may kaangtanan sa igahatag nga kompensasyon sang AC Energy sa fisherfolks nga naapektuhan sang oil spill sa Brgy. Calumpang, Molo, Iloilo City.
Sa interview sang Bombo Radyo kay Niño, iya ginpahayag nga sa iya record, tatlo na ka hugnat nga food packs distribution ang ginpatigayon apang ini ang halin sa Department of Social Welfare and Development kag sa barangay council.
Suno kay Niño, naglab-ot sa 54 ka manugpangisda ang nalakip sa listahan sang mga nakabaton sang food packs.
Magluwas diri, nakapatigayon naman sang pagpanglimpyo sa coastal area kaupod ang mga volunteer, barangay officials kag barangay tanod.
Sa subong, ginpahayag sang natungdan nga ang City Disaster Risk Reduction and Management Office sa pagpamuno ni Donna Magno amo ang nagapakig-angot sa AC Energy may kaangtanan sa kompensasyon nga mahimo mabaton sang mga naapektuhan sang oil spill.
