GUIMARAS – Wala sang personal nga koordinasyon ang AC Energy sa local government unit sang Buenavista, Guimaras.
Ini ang alegasyon ni Buenavista Mayor Eugene Reyes 10 ka adlaw pagkatapos nga naglupok ang power barge sang nasambit nga kompaniya nga nag-apekto sa 17 ka coastal barangays sa amo nga banwa.
Sa interview sang Bombo Radyo kay Reyes, iya ginpahayag nga wala sang ayuda nga napalab-ot ang AC Energy kag may yara man sang indi paghangpanay nga natabo sa pagpaninlo sang bunker fuel sa mga baybayon.
Ginpahayag ni Reyes nga nag-umpisa na ang manual scooping sang bunker fuel matapos naghatag sang Personal Protective Equipment ang AC Energy, apang baliskad sa nauna nga hinambalan, wala sang pagkaon kag sweldo nga ginhatag sa manugpaninlo.
Indi man mahangpan ni Reyes kun lehitimo nga tiglawas sang kompaniya si Engr. Edwin Gallego nga amo ang nagaistorya sa mga barangay officials.
Sa subong, nagpalab-ot na sang relief goods ang local government unit sa mga pumuluyo nga may tuman ka apektado nga palangabuhian.
“SABAT SANG AC ENERGY”
Ginkumpirma naman ni Gabino Ramon Mejia, pinuno sang Plant Operations sang AC Energy, nga tiglawas sang kompaniya si Engr. Edwin Gallego.
Suno kay Mejia, si Gallego kag ang 21 ka iban pa nga personnel ang nagapakig-angot sa mga punong barangay para sa ‘regular coordination’ may kaangtanan sa halit sang oil spill.
