Yara na sa kustodiya sang Senado ang accountant ni suspended Bamban, Tarlac Mayor Alice Guo nga si Nancy Gamo matapos nga gin-aresto ini subong nga Sabado, Hulyo 13.
Ginpaidalom anay si Gamo sa medical checkup antes ini gindala sa Senado sa Pasay City kun sa diin magapabilin siya samtang ginahulat ang pagbalik sang inquiry sa gin-raid nga POGO hub sa Bamban.
Siya amo ang ginatudlo nga person-in-charge sa pag-file sang mga dokumento para sa mga negosyo sang Guo family.
Nahibaluan nga siya, ang alkalde, kag ang anum ka iban pa ang gindagdagan sang arrest order bangud wala ang mga ini nagapakita sa mga ginapatigayon nga hearing nga amo ang nagatul-id sang iligal nga mga aktibidad sang POGO kag ang involvement ni Guo.
Apat tanan ka teams ang ginpadala sang Senado agud dakpon sanday Guo, Gamo, Dennis Cunanan, kag mga himata sang alkalde nga sanday Sheila Leal Guo, Wesley Leal Guo, Jian Zhong Guo, Seimen L. Guo, kag Wenyi Lin.
24 oras ang ginhatag sa Office of the Sergeant-at-Arms (OSAA) para maserbe ang arrest orders kag ma-detain ang walo ka mga indibidwal sa Senado sa Pasay.
Sa inisyal nga impormasyon, wala si Guo sa iya address sa Bamban amo man ang iya mga utod nga sanday Sheila, Seimen, kag Wesley sang ginkadtuan sang otoridad sa ila rehistrado nga address sa Marilao, Bulacan kag Valenzuela City.
