ILOILO CITY- Gintawag sang Alliance of Concerned Teachers(ACT) nga inhustisya ang 20 percent nga tax sa honorarium para sa mga manunudlo nga magaserbe bilang poll workers sa palaabuton nga 2022 elections sa Mayo.
Sa interview sang Bombo Radyo kay Max Montero, Chairman sang ACT -Western Visayas, iya ginpahayag nga kabaylo sang serbisyo sang mga manunudlo ang ila seguridad kag risgo sa ikaayong lawas gani sa baylo nga tax, mas nagakadapat nga incentives ang ila mabaton.
Suno kay Montero, nagalangot ang ila buot bangud nga sa pihak sang pagpasiguro sang mga manunudlo nga mangin tampad kag matinlo ang eleksyon, kaangay nga ginadingutan pa sila sang butang nga nagakadapat ihatag sa ila.
Nahibaluan nga base sa Resolution 10727 sang Commission on Elections (COMELEC), ang honorarium para sa mga manundlo nga magapungko nga members sang Electoral Board ang P7,000 para sa chairman kag P6,000 para sa members, kag may dugang nga P2,000 nga para sa transportation allowance.
