ILOILO CITY – Ginpangunahan ni Acting Regional Director Police Brigadier General Sidney Villaflor ang random drug testing sa tanan nga myembro sang command group, regional staff, personal staff kag mga pinuno sang national support units sa Police Regional Office VI subong nga adlaw.
Sa interview sang Bombo Radyo kay Police Major Mary Grace Borrio, spokesperson sang Police Regional Office VI, iya ginpahayag nga pagkatapos sang traditional nga flag raising ceremony, ginpakadto sa administration building ang mga ini agud nga magpaidalom sa drug testing.
Suno kay Borrio, katuyu-an sang nasambit nga tikang nga mapasiguro nga drug free ang mga kapulisan agud nga mapabilin ang ila nga integridad.
Ginalauman nga subong nga adlaw ukon sa mga masunod nga inadlaw, ipagwa na sang Regional Forensic Unit 6 ang resulta sang drug test.
Si Villaflor ang nagpungko bilang acting regional director sa Police Regional Office VI sang nagligad lamang nga Mayo 22, 2023.
