Bukas sa expansion sang operation sa Antique Airport si Acting Secretary Department of Transportation Giovanni Lopez.
Sa subong, may ara na ini sang anum (6) ka check-in counters, halin sa una nga duha (2) lamang.
May yara naman sang bag-o nga gin-develop nga ramp nga sarang makaserbisyo sang tubtob apat (4) ka jet aircraft sa pareho nga tion, nga nagpadako sang operational capacity sang airport.
Sa interview sang Bombo Radyo kay Giovanni Lopez, Acting Secretary sang Department of Transportation, iya ginpahayag bangud sa pagdugang sang kalabaon sang runway nga halin sa 1,430 metros pakadto sa 1,800 ka metros, nagahatag ini sang kahigayunan sang pag-akumodar sang jet aircraft.
Apang padayon pa nga nagapakig-angot sa Local Government Unit (LGU) sang Antique bangud may ara sang mga panimalay kag imprastraktura sa puno kag punta sang runway.
Kahapon nga adlaw ginpangunahan ni President Ferdinand Marcos Jr. ang inagurasyon sang Antique Airport Development Projects sa Funda Dalipe, San Jose de Buenavista, Antique.
Nahibaluan nga ang development ang may balor nga Php1.576 billion, nga ginalakipan sang bag-o nga ginpatindog nga Passenger Terminal Building (PTB) nga mahimo nga makaakumodar sang tubtob 360 ka pasahero, kumpara sa una nga 64 lamang.
