Nagdepensa si Iloilo City Councilor Atty. Rommel Duron natuhoy sa huring-huring nga wala na siya nagapabatyag kag nagahatag sang bulig sa mga pumuluyo sang syudad sa tunga sang nagapadayon nga pandemya.
Sa interview sang Bombo Radyo kay Councilor Duron, nga amo ang chairman sang Committee on Good Government and Public Accountability sa konseho, iya ginpahayag nga wala sang kamatuoran nga nagakadula siya bangud ang tanan nga trabaho sang Iloilo City Government ang nagalabay sa iya agud maaprubahan.
Gin-athag man ni Duron nga wala sang ayuda ukon mga foodpacks nga ginapanagtag ang gobyerno kun wala niya ini gin-aprubahan kag ginbuligan nga matigayon.
Suno kay Duron, magluwas sa kampanya sang syudad sang Iloilo batok sa COVID-19, nagahimo siya mismo sang inisyatibo nga magkadto sa mga barangay agud magpahanumdom sa mga pumuluyo nga magsunod sa tanan nga minimum public health standards.
Dugang pa niya, nagikan sa iya kaugalingon nga bulsa, nagapanagtag man siya sang facemask, kag iban pa nga pagkaon bilang ayuda sa mga nagakadto mismo sa iya kag nagapangayo sang bulig sa Iloilo City Council.
