Ginkadlawan lamang ni Lanao del Sur Rep. Zia Alonto Adiong ang ginhimo sang Chinese Embassy in Manila nga paglakip sa iya sa “listahan.”
Kaangot ini sa gin-post nga picture sang embahada subong nga semana kun sa diin may mga pangalan sang kongresista nga amo ang nagpanawagan nga kakason bilang ambassador si Ambassador Jing Quan.
Nagpaandam naman ang embahada nga nabutang na ini nga mga kongresista sa “record” kag yara na sila sa “listahan.”
“Well, okay lang yan, basta hindi yan listahan ng utang, kasi alam ko wala akong utang sa China,” suno kay Adiong.
Sang ginpamangkot sa posibilidad nga ideklarar siya nga persona non grata sa Beijing ukon sa ila teritoryo, nagsabat si Adiong nga wala man sang madula sa iya bangud wala man siya nagalagaw sang masami didto, wala man siya sang negosyo, kag wala man siya sang economic interest sa amo nga pungsod.
“Hindi naman ako madalas mag-travel sa China, wala naman akong economic interest sa China, wala naman ho akong negosyo para matakot ho ako. Hindi ako natatakot maski ano sabihin nila, maski i-persona non grata ako. Kasi local part ako na tao. Ang dami kayang magandang puntahan dito sa Pilipinas,” dugang sang kongresista.
Nahibaluan nga sa joint statement nanday Adiong kag sang walo ka iban pa nga mamalidha, ila ginpanawagan kay President Bongbong Marcos nga i-reconsider ang iya nauna nga position nga indi sini pag-i-expel ang Chinese envoy.
Ini apisar sang kontrobersyal nga pahayag ni Jing nga mahapos lang para sa China nga mapierde ukon malupig ang Pilipinas kun maggamit sila sang pwersa; apang gindugang sini nga indi man sila maghimo sini bangud nga gusto nila sang kalinong. Ginpakamalaot sang Philippine officials ini nga statement bangud ginalantaw nga isa ini ka pamahog sa Pilipinas ilabi na nga mataas ang tensyon sa West Philippine Sea nga ginaangkon sang China apisar sang 2016 Arbitral Award.#
