ILOILO – Dapat nga kabigon nga welcome development ang adjudication process sa mga pulis nga nalakip sa narcolist.
Ini ang pahayag ni Police Regional Office 6 Director Police Brigadier General Rene Pamuspusan tuhoy sa adjudication process nga ginpatigayon sa 357 ka mga pulis nga ginapahayag naangot sa illegal drugs kun sa diin isa na diri ang kontrobersiyal nga si Police Lt. Col. Jovie Espenido.
Sa interview sang Bombo Radyo kay Pamuspusan, iya ginpahayag nga kun siya lang ang pamangkuton, ginakabig niya nga maayo nga balita ang adjudication process bangud nga ginahatagan sang kahigayunan ang mga ginhingadlan nga police scalawag nga matin-lu-an ang ila pangalan.
Suno kay Pamuspusan, may yara sang national adjudication board nga amo ang nagatipon kag amo man ang nagakumpirma sang mga impormasyon tuhoy sa mga pulis nga naulamid sa narcolist.
No comment naman ang Regional Director tuhoy sa paghatag sang pahayag tuhoy sa ginakaulamiran ni Espenido.
Sa pagkamatuod suno kay Pamuspusan, may yara man sang gag order ang tanan nga opisyal sang Philippine National Police nga indi maghatag sang pahayag samtang wala pa natapos ang imbestigasyon sang national adjudication board.
Suno kay Pamuspusan, iya liwat nga istoryahon si Espenido tuhoy sa iya nga pagpatigayon sang press conference apisar sang gag order.
