Iloilo – Padayon nga naganubo ang edad sang mga kabataan nga nagabusong.
Sa data sang Philippine Statistics Authority sang 2020, 9.10% ang na-record nga adolescence pregnancy sa mga naga-edad 10 tubtob 19 anyos.
Sa interview sang Bombo Radyo kay Roilo Vincent Laguna, Population Program Officer III sang Commission on Population and Development Region 6, iya ginpahayag nga ang kakulang sa edukasyon sa Reproductive Health, access sa mga contraceptives kag pills, kapigaduhon, kag kakulang sa komunikasyon ang ginatumod mga rason sang pagnubo sang edad sang mga nagabusong sa pungsod.
Partikular diri sa Western Visayas, nagapadayon man ang pagnubo sang edad sang mga nagabusong.
Sa data sang ahensya, sang 2020, may yara sang tatlo ka mga pamatan-on nga naga-edad 10 ka tuig nga nagbusong.
Ini ang mas manubo kun ipaangid sang 2019 kun sa diin, 12 anyos ang edad sang pinakabata nga nagbusong.
Ginapahayag dugang sang natungdan nga masami ini nagakatabo sa mga kaumahan kun sa diin, manubo ang ihibalo sang mga pamatan-on sa Reproductive Health Education.
Sa subong, nagapadayon ang programa sang Commission on Population and Development agud mapahagan-hagan ang kaso sang adolescence pregnancy sa pungsod pinaagi sa pag-localize sang Reproductive Health Education sa tagsa ka mga local government units sa gahom sang Executive Order 138.
Samtang, nagpanugyan naman si Laguna sa mga pamatan-on nga mangin responsable kag hibaluon ang konsekwensya kun himuon ang mga butang nga hinulsulan sa ulihi.
