Nagkasugtanay na ang Afghanistan kag Pakistan nga magpatuman sang temporaryo nga ceasefire matapos ang pila ka semana nga inaway nga nagresulta sa kamatayon sang madamo nga mga tawo.
Ang nasambit nga ceasefire, nga ginpangunahan sang Qatar kag Turkey, gilayon man nga ginpatuman agud mapunggan anay ang bayluhanay sang lupok sa border sang duha ka pungsod.
Matandaan nga naglala ang tensyon umpisa pa sa sini bulan.
Ginapanginwala naman sang Taliban-led government sang Afghanistan ang mga alegasyon nga nagahatag ini sang refuge sa mga militante nga naga-atake sa border areas.
Suno sa spokesperson sang Taliban nga si Zabihullah Mujahid, naghisugtanay ang duha ka kampi nga indi magpatigayon sang bisan ano man nga indi manami nga lihok sa isa kag isa.
Lakip sa ceasefire ang pagdumili sa pagsuporta sa mga grupo nga nagapatigayon sang pag-atake sa pihak nga kampo.
Dugang pa, may mga tikang nga ginahimo kaupod sang mga pungsod nga naga-serbe bilang mediator, agud masiguro ang matawhay nga implementasyon sang ceasefire kag ang posible nga diplomatic nga resolusyon sa mga indi pag-intindihanay.
