Nagpangabay ang militar sa publiko nga maglikaw anay sa paglukso sa konklusyon samtang nga wala pa natapos ang imbestigasyon sa isa ka Chinese national nga naaresto sa Makati City subong nga semana nga nakitaan sang mga hacking equipment.
Suno kay Armed Forces of the Philippines (AFP) spokesperson Col. Francel Margareth Padilla, gina-id-id pa ang paglantaw sa mga sikkumstansya nga nakapalibot sa pagdakop kay Yuhang Liu nga gin-detain sang law enforcement authorities bangud sa unauthorized firearms kag equipment nga naangot sa communications hacking.
Sensitibo ini nga kaso suno sa militar ilabi na bangud isa ka foreign national ang involved.
“We are currently investigating the circumstances surrounding the arrest of Yuhang Liu, who was detained by law enforcement for possessing unauthorized firearms and equipment potentially linked to communications hacking,” suno kay Padilla.
Nagapakig-angot man ang AFP sa Philippine National Police (PNP) kag iban pa nga relevant agencies agud ma-examine ang nakumpiskar nga kagamitan kag malantaw ang intensyon kag diin kutob ang aktibidad sini.
Matandaan nga gin-aresto si Liu sa Barangay Isidro sa Makati bangud sa report nga ginpwersa sini kag ginpahog ang isa ka Pinoy nga mag-deliver sang communication hacking devices sa iya balay sa Paranaque.
Nakita man sa salakyan sang suspek ang 9mm handgun, mga gadgets kag electronic equipment lakip ang antenna system, battery units, solar inverter, radio receiver kag transmitter, router, computer tablet, computer laptop kag cell phones sa iya salakyan. Sa iya naman condominium unit, nakit-an ang aerial drone, inverter unit, computer central processing unit, portable power station kag iban pa nga gadgets.
Ginalantaw sang militar kun may iban pa ini nga kaupdanan bangud ginakabig nga makaalarma ang intension sini bangud sa mga equipment nga ginapanag-iyahan nga naangot sa hacking kag surveillance.
