ILOILO CITY – Ginpanginwala sang Armed Forces of the Philippines ang akusasyon nga ang Pilipinas ang nagapanggarit-garit sa China sa West Philippine Sea.
Ini ang kadungan sang pahayag sang Chinese state media nga ang pungsod ang sulit-sulit nga nagapanghilabot sa teritoryo sang China sa West Philippine Sea, nagapalapta sang sala nga impormasyon kag iligal nga nagapakig-alyansa sa extraterritorial forces agud nga mangin halinan sang trouble.
Suno kay Armed Forces of the Philippines Spokesperson Col. Medel Aguilar, ang Pilipinas ang padayon nga nagasunod sa international law kag ang China amo ang nagapatigayon sang delikado nga mga tikang sa West Philippine Sea nga makapila ka beses nga nagbutang sa delikado sa kabuhi sang mga manugpangisda.
Una na nga ginpahayag sang China nga ang Pilipinas ang nagasalig lamang sa suporta sang Estados Unidos sa padayon nga pagpanggarit-garit sa China.
Suno pa sa Beijing, ang ini nga kaangay nga “extremely dangerous” behavior ang nagahalit sa kalinong kag katawhay sa rehiyon.
Apang suno kay Aguilar, madamo sang mga pungsod ang padayon nga nagasuporta sa Pilipinas sa maritime dispute bangud nga ginakilala nila ang position sang pungsod sa West Philippine Sea nga balido.
Samtang, nagpanawagan si Sen. Koko Pimentel sa gobyerno sang Pilipinas nga tindugan sini ang ground apisar sang akusasyon sang China.
Ang halos kabilugan sang West Philippine Sea, lakip na ang mga kadagatan kag isla malapit sa kaiping nga pungsod ang gina-angkon sang China kag ginabasura ang international tribunal ruling nga nagpanindugan nga wala sang legal nga basehan.
Nag-deploy sila sang mga barko agud nga magpatrolya sa waterway kag nagtukod pa sang artificial islands.
