Wala pa sang may nabaton nga report ang Armed Forces of the Philippines kaangot sa pwersa sang Russia nga naga-upod sa drills sang Chinese warships sa West Philippine Sea.
Suno ini kay AFP chief General Romeo Brawner Jr. apang nagpasalig man ini nga padayunon nila ang pag-monitor para sa safety sang mga Pilipino.
Antes sini, may yara sang report halin sa Jakarta Post, isa ka English-language newspaper sa Indonesia, nga ang Pacific Fleet Sovershennyi corvette sang Russia kaupod sa warships sang People’s Liberation Army Navy ang naga-conduct sang training agud nga i-inspect ang makaduluda nga vessel kadungan sang joint naval patrol sa Philippine Sea.
Sa subong, ang lamang nahatag nga kumpirmasyon sang AFP amo ang presensya sang Chinese naval carrier strike group sa dagat sang Pilipinas.
Ini nga Chinese People’s Liberation Army Navy (PLAN) Shandong Carrier Strike Group ang naga-operate na sa Philippine Sea kag ini man ang nagamarka sang labing-una nga tion subong nga tuig nga gin-deploy ang aircraft carrier sa guwa sang teritoryo sang China.
Base sa report sang United States Naval Intelligence, katapusan nga napadala ini nga aircraft carrier sang Oktubre kag Nobyembre 2023.
Base man sa latest report sang amo nga ahensya, ang joint People’s Liberation Army Navy-Russian Navy patrol ang naga-operate man sa Philippine Sea kun sa diin duha ka warships ang iya sang Russia para sa nasambit nga Indo-Pacific deployment.
Magluwas diri, una na nga ginkumpirma sang PCG nga yara sa Escoda Shoal kon sa sulod sang exclusive economic zone sang Pilipinas ang pinakadaku nga barko sang China Coast Guard ukon ang “The Monster” nga malapit man sa ginaplastaran sang BRP Teresa Magbanua.
