Nagapreparar na ang Armed Forces of the Philippines (AFP) sa posible nga balos sang China matapos ang insidente sang pagbunggu-anay sang duha ka Chinese vessels samtang nagalagas sa barko sang Pilipinas sa Bajo de Masinloc.
Ini ang ginpahayag ni Philippine Navy spokesperson for West Philippine Sea (WPS) Rear Admiral Roy Vincent Trinidad sa tunga sang nagapadayon nga tensyon sa nasambit nga lugar.
Sang Lunes, nagpadulong sa Bajo de Masinloc ang mga personnel halin sa Philippine Coast Guard (PCG) kag Bureau of Fisheries and Aquatic Resources (BFAR) agud maghatag sang ayuda sa mga Pilipino nga manugpangisda, kabahin sang ginapatuman nga Kadiwa program.
Apang ginreport sang PCG nga pila ka barko sang China ang nagpang-harass sa ila pinaagi sa paggamit sang water cannon, delikado nga maneuvers, kag pag-sunod sa ila mga barko.
Sa tunga sang tensyon, nagbunggu-anay ang duha ka Chinese vessels, ang People’s Liberation Army Navy (PLAN) 164 kag ang China Coast Guard (CCG) vessel 3104 samtang nagasunod sa BRP Suluan sang PCG.
Bangud sini, nakaangkon sang dako nga kahalitan ang barko sang CCG nga ginkabig nga indi na seaworthy.
Samtang, naguba man ang flagpole sang barko sang PCG.
Ginklaro ni Trinidad nga wala ginagamit sang AFP ang pwersa militar kun indi lang para sa self-defense, suno sa mandato sang Pilipinas.
Dugang pa niya, nagadugang ang presensya sang Chinese vessels, indi lamang sa Bajo de Masinloc kundi apang sa mga isla sa northern Philippines, kabangdanan sang pagtaas sang kabalaka sa seguridad sa kadagatan sang West Philippine Sea.
