Ginasukot sang Armed Forces of the Philippines (AFP) sang P60 million ang China matapos nga ginbanggaan sang Coast Guard sini ang mga Filipino Navy personnel kadungan sang resupply mission sa Ayungin Shoal sang nagligad nga Hunyo 17.
Suno kay AFP chief General Romeo Brawner Jr., katumbas ini sang mga equipment sang Pilipinas nga naguba bangud sang pagpang-harass sang China sang amo nga tion.
Pahayag pa ni Brawner, nagsulat siya kay Defense Secretary Gilberto Teodoro Jr. agud nga ma-forward sa Department of Foreign Affairs (DFA) nga amo naman ang magapalab-ot sa counterparts sini sa Beijing.
Apang gin-athag ni Brawner nga indi sakop sang sini nga balor ang presyo sang mga armas nga ginkuha man sang mga Chinese personnel. Ang amo nga mga armas ang pagadal-on kuntani sa BRP Sierra Madre.
Magluwas sa P60-million, gusto man sang AFP nga sabton sang China ang gasto sa pagbulong sa Philippine Navy personnel nga nautdan gid sang tudlo bangud sa amo nga insidente.
“We are also looking into the possibility of charging them with the cost of restructuring the hand of [Seaman First Class Jeffrey Facundo] kasi ooperahan po siya para bumalik ‘yung function ng kaniyang kamay. Meron po kasing mga medical technology ngayon na bago nang sa gayun ay magamit niya ulit ‘yung kaniyang kanang kamay,” pahayag ni Brawner.
Matandaan nga nagpaguwa na sang pahayag si President Ferdinand Marcos, Jr. nga nagatawag sa ginhimo sang China nga “illegal” apang wala pa ini ginakabig nga armed attack suno sa iya kag indi pa pag-iinvoke ang Mutual Defense Treaty (MDT) kaupod sa Estados Unidos sang Amerika.
