𝗠𝗔𝗡𝗜𝗟𝗔 — Nagsiling ang Armed Forces of the Philippines (AFP) nga wala sang military activity sang China sa lugar sang Bajo de Masinloc, nga kilala man nga Panatag kag Scarborough Shoal, sa ulihi nga mga inadlaw bisan pa nga gina-test sang China ang ila strike capabilities sa South China Sea.
Sa pahayag ni Armed Forces of the Philippines Public Affairs Chief Col. Xerxes Trinidad, sa pihak sang regular nga ilegal nga paglapas kag presensya sang mga Chinese maritime militia vessels, wala sang na-monitor nga ano man nga ginahimo nga exercise ukon combat patrols.
Ginmention niya nga ang pinakaulihi nga military exercise sang China sa South China Sea natabo sang katapusan pa sang Hulyo.
Samtang ang China naglunsar sang Air kag Sea Patrols malapit sa Scarborough, ang United Stated kag Pilipinas ang nagahimo man sang Joint Drills.
Apang, ginpahayag ni Trinidad nga narekord nila ang pila ka mga Chinese vessels nga nagasunod sa mga barko nga nagapartisipar sa maritime exercise nga gin-organisar sang US, Pilipinas, Australia, kag Canada.
Ini amo ang: Navy WUZHOU (FSG 626) Jiangdao II Class Corvette, Navy HUANGSHAN (FFG 570) Jiankai II Class Corvette, kag Navy QUJING (FSG 668) Jiangdao II Class Corvette.
Nagpasalig man ang natungdan nga ang Armed Forces of the Philippines, sa koordianasyon sa Philippine Coast Guard kag iban pa nga ahensya, magapadayon sa pagmonitor sang sitwasyon bilang bahin sang mandato para protektahan ang teritoryo, soberanya, kag sovereign rights base sa international law.
