Ginsabat sang Armed Forces of the Philippines (AFP) ang alegasyon sang China nga ginpangguba sang Philippine Navy ang ila nga fishing nets sa Ayungin Shoal sa West Philippine Sea.
Suno kay AFP spokesperson Colonel Francel Margareth Padilla, ini nga statement sang China ang nagatuyo nga i-distract na naman ang publiko gikan sa kun ano ang matuod nga nagakatabo sa teritoryo. Ang isyu suno sa militar amo ang iligal kag agresibo nga aktwasyon sang China sa kadagatan nga sakop sang Pilipinas.
“It seeks to distract from the real issue at hand: their ongoing illegal, coercive, aggressive, and deceptive actions and activities in the West Philippine Sea,” suno kay Padilla.
Dugang pa sang militar, indi na sini pagpalawigon ang sabat sa claims sang China, apang ginsulit man sang armadong-kusog nga ang presensya sang mga barko sang China sa exclusive economic zone sang pungsod ang makabig nga illegal kag provocative.
Ginsulit man sini nga may kinamatarong ang Pilipinas sa sini nga kadagatan bangud amo ini ang nakasaad sa idalom sang international law ilabi na sa United Nations Convention on the Law of the Sea.
“We will not dignify these claims with a detailed response. It is important to reiterate that the presence of Chinese vessels within the Philippine Exclusive Economic Zone (EEZ) is illegal and provocative,” dugang ni Padilla.
Matandaan nga una gin-akusaran sang China ang Philippine Navy nga amo ang nagbutong sang 100-metros nga fishing net pakadto sa BRP Sierra Madre sa Ayungin Shoal matapos nga nagbiya ang mga manugpangisda sang China. Antes sini, ginpasibangdan man sini ang militar sang Pilipinas nga nangtaya sang armas sa China Coast Guard sang Mayo 19 — butang nga ginpanginwala naman sang Pilipinas.
