Nagpakig-angot na ang Armed Forces of the Philippines (AFP) sa United States Indo-Pacific Command (USINDOPACOM) agud magamit ang mga Enhanced Defense Cooperation Agreement (EDCA) sites para sa relief efforts samtang malain ang tyempo sa Pilipinas kag may lapnagon nga pagbaha.
Suno kay Defense Secretary Gilbert Teodoro, naistorya na sini si AFP Chief of Staff General Romeo Brawner, Jr. para nga ma-facilitate sini ang paggamit sang EDCA facilities.
Siyam ang military facilities sang US diri sa Pilipinas nga yara sa Palawan, Pampanga, Nueva Ecija, Cebu, Cagayan de Oro City, Sta Ana, Cagayan, Lal-lo, Cagayan, kag sa Gamu, Isabela.
Ginagamit man ini nga mga pasilidad para sa disaster response kag relief efforts ilabi na kun may serye sang bagyo nga naga-igo sa pungsod.
“Ako po’y kausap si General Brawner, sa ating Armed Forces of the Philippines, at iko-coordinate din po niya ang mga kinakailangan na tulong sa USINDOPACOM upang magamit ang EDCA facilities at iba’t-iba pang mga kagamitan na kinakailangan na katulong ng ating Armed Forces of the Philippines upang makarsponde sa ating mga kababayan,” kabahin sang iya video statement.
Sa iya mensahe, nagpahayag man ang tiglikom nga nagtanyag sang bulig ang Japan kag iban pa nga kaalyado. Ginplastar sini kun ano ka-importante ang international military partnerships pati na sa tion sang kaangay sini nga mga kalamidad.
Sa ayuda naman, ginsiguro ni Department of Social Welfare and Development (DSWD) Secretary Rex Gatchalian kay Teodoro nga naka-preposition na ang relief goods kag handa para ipanagtag.
Ginpasalig sang opisyal nga bisan yara sila sa Estados Unidos sang Amerika kaupod kay President Ferdinand Marcos, Jr. para sa official visit, naga-monitor sila 24/7 kag nagatinguha nga maka-responde gid sa kinahanglanon sang mga Pilipino nga apektado sang malain nga tyempo.#
