Wala ginsapak sang Armed Forces of the Philippines (AFP) ang paandam nga ginbuy-an sang China batok sa naval drills nga ginahimo sang Pilipinas kaupod ang United States kag Japan sa West Philippine Sea (WPS).
Suno kay AFP public affairs office chief Colonel Xerxes Trinidad, ang pag-updanay sang tatlo ka nasyon ang nagapakita sang pareho kag patas nga dedikasyon nga magsunod sa international order.
Ginpahayag ni Trinidad nga nakabase sa United Nations Convention on the Law of the Sea (UNCLOS) ang pagpatigayon sang military sang routine patrols kag exercises sa sulod sang exclusive economic zone (EEZ) kag territorial waters sang pungsod.
Ginsiling man sini nga ini nga mga aktibidad ang nalakip sa sovereign rights sang pungsod kag nagabulig para sa pagpalinong sa rehiyon.
“The strength of our collaborative efforts underscores a shared dedication to upholding the rules-based international order,” suno kay Trinidad. “Pronouncements that deviate from established norms and lawful frameworks hold no weight against this unified stance.”
Matandaan nga ang China’s People Liberation Army (PLA) – Southern Theatre Command ang nagpaandam sa Pilipinas kasunod sang joint drills sang defense forces sang Philippines, US, kag Japan sang Marso 28.
“Collaboration with allies and other like-minded nations is a matter of national policy, designed to enhance defense capabilities and maritime domain awareness, ensure freedom of navigation, and uphold regional security,” dugang sini.
Ang West Philippine Sea amo ang maritime areas sa western side sang Philippine archipelago lakip ang Luzon Sea kag ang katubigan sa palibot sini nga sulod kag kaiping sang Kalayaan Island Group kag Bajo de Masinloc.#
