ILOILO CITY- Suportado sang Office of the Presidential Assistant for Visayas ang lihok sang mga Local Government Unit sa Visayas nga pag-ban sang pagsulod sang live pigs, pork kag pork products gikan sa Luzon kag Mindanao bilang proteksyon gikan sa African Swine Fever.
Sa interview sang Bombo Radyo kay Assistant Secretary Jonji Gonzales sang Office of the Presidential Assistant for the Visayas, iya ginpahayag nga apisar may pressure sa swine industry gikan sa Luzon kag Mindanao nga nagahingyo nga tugutan ang pagsulod sang baboy sa Visayas, nagapanindugan ini nga dapat istriktuhan gid ang pagpatuman sang nasambit nga ban.
Suno kay Gonzales, wala man sang dapat kabalak-an ang mga pumuluyo sang bilog nga Visayas bangud stable gihapon ang presyo sang baboy nga nagapatimaan sang bastante nga suplay.
Sa Iloilo,suno kay Gonzales,8 billion pesos ang balor sang swine population nga may katumbas nga 16 tubtob 20 billion pesos nga industriya.
Samtang,mahimo naman nga hingalitan sang hograisers sa Visayas ang estado sini nga African Swine Fever free agud magsuplay sang baboy sa Luzon ukon sa Mindanao.
