ILOILO CITY – Wala na naglapta pa ang kaso sang African swine fever sa banwa sang Alimodian.
Nahibaluan nga may yara sang infected sang amo nga balatian sa Barangay Buhay.
Sa interview sang Bombo Radyo kay Alimodian, Iloilo Mayor Ian Kenneth Alfeche, iya ginpahayag nga sa gwa sang 0.50 kilometer-radius nagikan sa infected area, wala sang may nagbatyag nga baboy.
Gin-ubos na patay ang 57 tanan nga baboy sa sulod sang quarantine area nga ginalakipan sang mga barangay nga Buhay kag Bangkal.
Apektado ang walo tanan ka mga hog raisers.
Suno pa sa alkalde, subong nga semana, may yara sang kuhaon nga blood sample sa Barangay Sulong nga yara na sa gwa sang 0.50 kilometer-radius agud nga mahibaluan kun bala, isolated gid lamang ang kaso sang African swine fever sa banwa.
Sa subong, nagatutok anay ang banwa sa containment sang balatian kag may yara na sang inisyal nga bulig para sa mga apektado nga hog raisers.
Dako naman ang pasalamat sang banwa sa mga hog raisers bangud sang ila kooperasyon.
Apektado naman ang presyuhanay sang baboy sa merkado sang banwa sang pamahog sang amo nga hog disease.
