Nangin dako ang papel sang Bombo Radyo Iloilo agud mabuligan ang isa ka anak nga masobra duha ka dekada na nga nagapangita sa iya amay.
Sa interview sang Bombo Radyo kay Ronaldo Costorio, sang Bacjawan Sur, Concepcion, Iloilo, iya ginpahayag nga 26 ka tuig niya nga wala nakita ang iya amay.
Si Costorio ang nagtapos sa kurso nga Marine Engineering sa University of Antique, pinaagi man sa iya paghimakas.
Si Costorio ang anak sa luwas sang iya amay kag agud makalikaw na sa gamo, ginpakamaayo sang iya iloy nga magpalayo na lang.
Ginbuligan si Costorio sang utod sang iya abyan agud makilala sini ang iya amay.
Suno kay Costorio, isa ka seafarer ang iya amay kag may yara naman sang pamilya sa diin may apat siya diri ka utod nga ginabug-usan sang tatlo ka lalaki kag isa ka babaye.
Ang mga ini ang naga-istar sa subong sa Danao City, Cebu.
Samtang naga-isahanon naman siya nga anak sang iya amay kag iloy.
Apang ang iya iloy ang nakapamana kag may walo siya ka mga utod.
Sang nakakuha na siya sang contact, gin-chat sini ang utod niya sa amay kag tuman man ang pagpasalamat sini bangud mainit man ang pagbaton sang mga ini sa iya.
Tuman naman ang kalipay sini bangud apisar sa video call lang sila nag-istorya, nakilala sini ang iya amay.
Ginpakigbahin man ni Costorio nga ginhambal sang iya amay nga nagabot na ang tunok sa iya tagipusuon.
Marso 8 subong nga tuig sang naka-istorya sila sang iya amay virtually.
Sa bulan naman sang Hunyo, magapanaog naman sa barko ang iya amay nga amo ang una nila nga pisikal nga pagkit-anay.
