MANILA – “Very disappointing” kag makahalam-ot ang natabo sa Kamara kasunod sang pagboto sang 186 ka mga mamaliha kay Marinduque Rep. Lord Allan Velasco bilang House Speaker tal-os kay Taguig Pateros Rep. Alan Peter Cayetano.
Ini ang reaksyon ni Iloilo 1st District Rep. Janette Garin tuhoy sa kun-sin-o gid ang matuod nga House Speaker.
Sa exclusive interview sang Bombo Radyo kay Garin, iya ginpahayag nga indi maayo nga ehemplo ang pag-ilinaway sang mga mamalidha ilabi na subong nga prayoridad kun tani ang pagpasar sang national budget para sa 2021.
Suno kay Garin, bisan siya ang nakibot man sa natabo kag ang pagpili kun tani sang mangin House Speaker ang ipaagi sa nominal voting kag nagakadapat man nga may yara sang quorum kun sa diin sa subong, ang magic number sa Kamara amo ang 151.
Ginpahayag ni Garin nga mahimo nga makapatigayon sang pagbinutohay sa lain nga venue apang kinahanglan nga may yara sang resolusyon kag bilang Senior Deputy Minority Leader, ginpahayag sang mamalidha nga nagalibog man ang iya nga ulo sa nagakatabo sa subong.
Bangud nga may yara pa sang budget deliberation, ginpahayag sang natungdan nga siya kag ang mga kaupod nga Ilonggo Representatives ang magatrabaho santo sa ila katungdanan tubtub mapasar ang budget.
Tuhoy naman sa iya pagpirma sa manifest of support pabor kay Cayetano, gin-athag sang mamalidha nga ang nasambit nga dukomento ang nahimo sang nakaligad pa nga mga inadlaw kun sa diin ila nakasugtan nga suportahan ang House Speaker tubtub nga mapasar ang 2021 national budget kag amo na ugaling ang pagboto tuhoy sa gina-agawan nga House Speakership post.
Nahibalu-an nga subong nga adlaw, Oktubre 12, 186 ka mga mamalidha ang nagboto nga i-bakante ang posisyon bilang House Speaker sa pagtililipon nga ginpatigayon sa Celebrity Sports Plaza sa Quezon City kun sa diin si Velasco ang napili-an nga pinuno sang Kamara.
Para naman kay Cayetano, ang nasambit nga desisyon ang makabig nga peke.
“Well, kun lantawon mo, daw nahimo nga kaladlawan ang Kongreso. It’s very disappointing kay sa panglataw ta, indi man miyad nga obrahon ta ina ya nga naga irinaway ang mga lideres kag ang mga public officials in the midst of the very important obligation which is the passage of the budget”.
