ILOILO – Emosyonal ang isa sa mga agrarian reform beneficiaries nga si Engeline Magbanua, residente sang Barangay Aldeguer, Sara, Iloilo matapos nabaton ang iya Land Title halin sa Department of Agrarian Reform subong nga adlaw.
Sa interview sang Bombo Radyo kay Magbanua, iya ginpahayag nga 11 ka tuig man nga hulat sang iya pamilya agud makabig nga lehitimo na ini nga nagapanag-iya sang duta.
Suno sa iya, madamo man nga sakripisyo ang ila naagyan kag subong ang adlaw nga ginakalipay niya bangud may papel na nga nagapamatuod nga may titulo na ini nga nakapangalan sa iya.
Pahayag ni Magbanua, bentaha gid nga may yara sang Ilonggo sa nasambit nga ahensya bangud gina-follow up kag gina-facilitate ang mga kinahanglanon sang mga benepisyaryo.
Nahibaluan nga si DAR Undersecretary Jesry Palmares ang isa ka Ilonggo, tumandok sang Passi City, Iloilo.
Nagpasalig ang natungdan sa Department of Agrarian Reform nga tipigan sini sang maayo ang duta kag nagpasalamat man sa ahensya ilabi na kay President Marcos bangud sa timprano nga pamaskwa sa ila.
