Aggressive driving ang nakit-an nga nagapanguna nga rason sang vehicular accident nga nagluntad sa Iloilo kadungan sang Semana Santa.
Lakip na diri ang natumba nga pribado nga jeep sa Brgy. Maninila, Miag-ao, Iloilo nga may sakay nga 70 ka pasahero sa diin, may 58 ka mga nasamaran.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office (IPPO), iya ginpahayag nga indi pa matumod kon mas madamo ang four-wheel vehicle ukon ang mga motorsiklo ang naaksidente sa tion sang Kuaresma.
Gintuad man sini nga lakip sa mga rason sang mga disgrasya sa dalan amo ang impluwensya sang makahulubog nga ilimnon.
Suno kay Araño, kon indi reckless ang mga naga-drive, masami man nga over speeding kag overloading ang dala nga amo ang natabo sa Miag-ao, Iloilo.
Kaangot diri, ginpahayag sini nga wala sang may interes nga magpasaka sang panumbungon batok sa driver sang jeep.
Sa karon, walo na lang ka mga biktima ang nagapabilin nga yara sa ospital kag padayon nga ginabulong.
Natukiban man nga wala sang lisensya ang driver sang jeep, samtang expired naman ang rehistro sini.
