Ipadala sang Czech Republic ang ila nga agriculture officials sa Pilipinas sa masunod nga semana agud nga maka-establisar sang mas masangkad nga kooperasyon sa tunga sang duha ka pungsod nga amo man ang makasuporta sa food security programs.
Magapanguna sa delegasyon amo si Czech Agriculture Minister Marek Výborný.
Gin-anunsyo ini kadungan sang pagkit-anay nanday President Ferdinand “Bongbong” Marcos Jr. kag President Petr Pavel sa amo nga European country.
Lakip man sa dal-on sa Pilipinas amo ang mga negosyante nga posible mangin interesado man sa pag-invest sa agrikultura kag iban pa nga sektor. Lakip man sa namensyonar nga mga kumpaniya amo ang involved sa defense industry, manufacturing, science, technology, energy sector, kag power sector.
Suno sa Presidential Communications Office, magapakigkita si Minister Výborný kay Department of Agriculture Secretary Francisco Tiu Laurel kag may patigayunon man nga business forum sa Makati sa Marso 21. Magabisita man ang grupo sa Davao para sa business forum kag farm visit sa Tagum Agricultural Development Company, Inc.(Tadeco) sa Davao pagkasunod nga adlaw.
Nahibaluan nga isa ang Czech Republic sa daku nga mga partner sang Pilipinas nga nagahatag sang assistance sa pag-analisar kag pagpaayo pa sang value chains sa dairy industry sang pungsod.
Didto subong si President Marcos kag ang delegasyon sang Pilipinas sa kapital sang pungsod nga Prague para sa tatlo ka adlaw nga state visit.#
