Ginapamatukan sang grupo sang mga mangunguma ang ginhimo sang Department of Agriculture (DA) nga pag-apruba sang panibag-o nga importasyon sang linibo ka metriko tonelada sang puti kag pula nga bombay.
Suno kay Jayson Cainglet, executive director sang Samahang Industriya ng Agrikultura (SINAG), indi ini ang tion para nga mag-import sang amo nga produkto.
Ginklaro sini nga wala sila nagabalabag sa importasyon, apang dapat kuntani nga himuon ini pagkatapos sang ani kaangay sang bulan sang Hulyo, Agusto, kag Septyembre.
Pahayag sini, kun ginasiling sang DA nga maga-abot na sa masunod nga duha ka semana ang imports, peak harvest man ini sa Pilipinas gani maga-dungan ang suplay.
Ginpahayag sini nga na-atrasar lang ang harvest subong nga tuig bangud sa Bagyo Pepito, apang wala sang ginapanan-aw nga problema sa volume.
Suno pa kay Cainglet, may pila ka mga mangunguma nga temprano pa nga naga-harvest sang ila produkto, bangud sa kahangawa nga mangin tuman ka nubo ang farmgate prices kun mag-inabot na ang bombay nga gin-import.
Una na nga ginpaathag ni DA spokesperson kag Assistant Secretary Arnel De Mesa nga indi man madamo ang iga-import bangud ginkonsiderar man ang peak harvest sa Marso. Ginalantaw nga magaabot ini sa Pilipinas sa Pebrero 20.
Sandig sa gin-aprubahan ni Agriculture Secretary Francisco Tiu Laurel Jr., lakip sa i-import amo ang 3,000 metric tons sang red onions kag 1,000 metric tons sang white onions.
Panigurado ini suno sa tiglikom nga bastante ang buffer stocks sang pungsod samtang ginahulat ang fresh harvest.
“This importation of 3,000 metric tons of red onions and 1,000 metric tons of white onions is intended to ensure we have sufficient buffer stocks while we await the fresh harvest,” suno kay Tiu Laurel.
“We will not risk a potential shortage that unscrupulous traders could exploit to drive up prices, as we saw in the past. We do not want a repeat of the 2022 crisis,” dugang sini.
Kun matandaan, sang 2022, nagsaka ang presyo sang bombay sa P700 kada kilo bangud sa kakulangan sang suplay nga ginpahayag nga ginpalala pa sang atrasado nga imports.
Base sa data sang Bureau of Plant Industry (BPI), ang monthly consumption sa Pilipinas ang yara sa 17,000 metric tons para sa red onions kag 4,000 metric tons naman para sa puti nga sibuyas.
