Ginsigurado sang Department of Agriculture (DA) nga may bastante pa nga suplay sang agricultural products sa Pilipinas nga makalawig pa sang tubtub 90 ka adlaw.
Ini apisar sang nagapadayon nga tensyon sa Middle East kag padayon nga nagasaka nga presyo sang gatong.
Suno kay Agriculture Secretary Francisco Tiu-Laurel Jr., wala sang isyu nga naga-apekto sa availability sang nagapanguna nga mga produkto lakip na ang bugas.
Ginalantaw man nga mangin estable ang suplay tubtub sa Hunyo.
Wala man sang problema sa suplay sa mais, kalamay, kag sibuyas.
Nagapadayon ang vegetable production suno sa tiglikom bangud sa current planting and harvesting season, samtang bastante man ang pork supply nga pareho nga may local production kag imported stocks sa cold storage facilities sa pungsod.#
