Napamatud-an na naman nga buhi gid ang “bayanihan” spirit sang mga Pinoy sa pageant scene sang nagpanguna ang tiglawas sang Pilipinas nga si Ahtisa Manalo sa “first station” sang “Cosmo People’s Choice” online poll sa Miss Cosmo 2024.
Suno sa organisasyon, ang Filipina candidate ang makabaton sang “special ‘Hope Star’ boost (x2 voting points) sa Final Stage: The Big Bang, private photoshoot, VIP party, 24-hour media team support, kag tyansa nga ma-take over ang Instagram sang Cosmo sa sulod sang 24 oras.”
May nabilin pa nga duha ka rounds para sa award nga amo ang “National Pride” kag “Big Bang.”
Ang final winner amo naman ang awtomatiko nga makakuha sang slot sa Top 10 sang Miss Cosmo 2024.
Nahibaluan nga leading man si Ahtisa sa isa pa gid ka Miss Cosmo online poll nga amo ang karera sa “Cosmo Social Ambassador” award nga ang winner awtomatiko nga sulod sa Top 21. Ang voting details sa sini nga duha ka polls ang naka-post man sa social media accounts sang pageant.
Patigayunon ang Miss Cosmo 2024 pageant halin sa September 15 tubtub sa October 5 sa Ho Chi Minh City, Vietnam.
Mayo sang ginhingadlan si Ahtisa nga Miss Cosmo Philippines 2024. Indi siya bag-uhan sa international pageant bangud natiglawas na sini anay Pilipinas sa Miss International pageant sang 2018 kun sa diin siya ang napilian nga first runner-up.#
