Ginkoronahan nga Miss Universe Philippines 2025 ang pageant veteran kag tiglawas sang Quezon Province nga si Ma. Ahtisa Manalo.
Nangibabaw ini sa 65 ka iban pa nga mga kandidata sa koronasyon nga ginpatigayon subong nga gab-i, Mayo 2, sa Mall of Asia Arena sa Pasay City.
Siya ang pang-anum nga winner sa idalom sang MUPH organization nga subong ginapangunahan na ni Miss Universe 2013 third runner-up Ariella Arida.
Ang nagpasa sang korona kay Ahtisa amo si Chelsea Anne Manalo nga amo ang reigning Miss Universe Asia.
Crowd-favorite si Ahtisa kag amo man ang number one pick sang madamo nga pageant community websites antes ang coronation night. Sang nagligad nga tuig, nangin second runner-up siya sa amo nga kumpetisyon, kag nagtapos sa Top 10 sang gintiglawas sini ang Pilipinas sa labing-una nga Miss Cosmo competition.
Nangin highlight sa performance sini sang natumba siya sa evening gown competition sa Top 12, apang ginsiguro sini nga gilayon makabawi kag indi madulaan sang composure.
Sa question and answer, ginpamangkot siya: “They say that a good leader leads by example. Tell us about one event in your life when you lived by example and the impact it made.”
Sabat sini: “I fell a while ago on stage and the thing with me is, whenever I fall in life, I always make sure I come back stronger. Last year, I was here on the stage, and for the second time this year, I’m here putting everything on this stage to be Miss Universe Philippines, because this is mine and my grandmother’s shared dream, and she passed away early this year, and this is my ode to her.”
Siya ang magadala sang pangalan sang Pilipinas sa Miss Universe 2025 nga hiwaton sa Bangkok, Thailand sa Nobyembre 21.
Yari ang kumpleto nga resulta sa subong nga edisyon sang MUPH pageant:
- Gabriella Carballo sang Cebu City – Miss Philippines Eco International 2025
- Katrina Llegado sang Taguig – Miss Philippines Supranational 2025
- Chelsea Fernandez sang Sultan Kudarat – Miss Philippines Cosmo 2025
- Teresita Ssen ‘Winwyn’ Marquez sang Muntinlupa – First Runner-Up
- Yllana Marie Aduana sang Siniloan, Laguna – Second Runner-Up
Nagtambong sa event bilang special guest si reigning Miss Universe Victoria Theilvig sang Denmark amo man ang tatlo ka iban pa nga continental queens nga kaupod ni Chelsea Manalo.
