Gin-athag ni Vice Mayor Jose Neil Olivares paagi sa iya nga Facebook post subong nga aga nga wala pa sang endorsement nga ginhatag ang Sangguniang Bayan sa isa ka Norwegian company nga magtukod sang Artificial Intelligence (AI) Data Center sa Barangay Abilay Sur sa amo nga banwa.
Ini nga statement ang ginpaguwa kasunod sang paglapta sang impormasyon nga may public consultation nga himuon 1:00 karon sa hapon.
Ginbalikan man sang netizens ang Facebook post ni Olivares sang Mayo 2, 2026 nga nagsiling: “Hopefully coming to Oton: An AI Data Center Developer by Norway Green Energy.”
Sa amo nga post ni Olivares, ginsiling nga may inisyal na nga pag-istoryahanay nga gin-facilitate sang Sanggunian. Ginlaragway man niya ini nga “1st in Western Visayas” kag “the largest in the Philippines.”
Sa official statement sini nga aga, ginpangabay sini sa publiko nga indi paghusgaran ang Council.
“Sa kasayuran sang tanan, wala pa naka-endorso ang Sangguniang Bayan sang Oton agod tugotan ang Norwegian nga kompaniya nga magtukod sang Data Center sa Abilay Sur. Palihog indi ninyo anay pag usgaran ang komitiba ukon ang bug-os nga Sanggunian,” suno sa Vice Mayor.
Ginpahayag sini nga makaduha ka beses na nga nagpatawag sang committee hearing agud matalakay ang proposal sang kompaniya kag makonsulta ang mga natungdan nga talatapan kag kabarangayan sang LGU Oton.
“Yari pa lang kita sa consultation stage. Ang official intent sang kompaniya aton gindala sa talatapan ni Mayor Sofronio Fusin agod iya man makonsulta ang iya mga Department Head,” suno pa kay Olivares.
Gin-athag sini nga sala ang mga impormasyon nga naghatag na siya sang endorsement.
“Kon may nagahambal nga ini nga proyekto gina-endorso sang Vice Mayor, iya komitiba ukon ang sanggunian mismo, ina sala nga impormasyon,” suno sa bise alcalde.
Ginpangabay sini ang mga pumuluyo nga magtambong sa public hearing sa Abilay Sur karon. Ginpasiguro man sini nga tun-an sang maayo ang proposal.
“Aton ginapasiguro sa mga natungdan nga pumuluyo nga aton tun-an sing maayo ang tanan nga anggolo kag implikasyon [pros and cons] antes kita maghatag sang desisyon sa sini nga proyekto.”
Dugang sini, “Tungod ang kompaniya nag-apply sing pormal, pormal man naton nga ipaagi ini sa husto nga proceso. Kon ano ang mas maayo para sa pumuluyo kag katilingban, dira maga-upod ang inyo Sangguniang Bayan. Sa liwat ginaklaro naton, yari pa lang kita sa pagpangunsulta sa pumuluyo.”
Nahibaluan nga ang hyperscale AI campus isa ka large-scale, purpose-built data center facility nga ginadesinyo agud nga maka-akomodar sang high-density computing infrastructure kag daku nga electrical demand. Sarang ini nga makasuporta sang AI training kag inference, cloud computing, kag iban pa nga data-intensive nga trabaho.
Sa post naman sang Sangguniang Kabataan (SK) sang Abilay Sur, ginbutang ang mga posible nga kaayuhan kag ang mga halit nga dal-on kun may yara sang data center.
“Ini nga assembly magatalakay kag magahatag sang impormasyon parte sa proposed Data Center nga pagatukuron diri sa aton barangay, lakip ang posible nga epekto sini sa aton komunidad kag palibot,” suno sa post sang SK.
Bangud isa ini ka proposal, ginpahayag sang SK nga importante nga magpamati kag magpamangkot agud nga makaangkon sang ihibalo sa isyu.
“Indi kinahanglan nga mangin “pro” ukon “anti” kita. Importante nga mahibaluan naton ang facts, magpamangkot, kag magpabati sang aton concerns agud masiguro nga ang development may benepisyo sa komunidad kag indi makadaot sa aton palibot,” pahayag pa sa ila nga Facebook post.#
